Rwanda | Ruhango: Abaturage b’umurenge wa Mwendo biyujurije Sacco ifite agaciro ka miliyoni zisaga 25

Iyi Sacco yatwaye akayabo ka miliyoni zisaga 25

Abanyamuryango ba Sacco “Abahizi Dukire” ya Mwendo bafatanyije n’ubuyobozi bw’iyi Sacco, bashoboye kwiyubakira inyubako bazajya bakoreramo ifite agaciro k’amafaranga angana miliyoni 25 n’ibihumbi 536.

Abanyamuryango ba Sacco Abahizi Dukire Mwendo, bakaba baritangiye umusanzu ungana na miliyoni 15 n’ibihumbi 084 by’amafaranga y’u Rwanda.

Depute Byabarumwanzi Francois afungura Sacco Abahizi Dukire

Ubwo iyi Sacco yafungurwaga ku mugaragaro tariki ya 14/09/2012, abanyamuryango b’iyi Sacco bakaba bavuga ko kuva iyi Sacco yabo yatangira mu mwaka wa 2009, ngo bakize ingendo bajyaga bakora bajya za Ruhango, Muhanga n’ahandi bagiye kubitsamu muma banki yaho.

Naho abandi bo ngo bakize kujya babika amafaranga mu bimuga, aho rimwe na rimwe basangaga yarangiritse.

Ubwo yafunguraga inyubako y’iyi Sacco Depite Byabarumwanzi Francois, yagarutse ku bayobozi bamwe bagenda bagaragaza imyitwarire mibi bakanyereza umutungo w’abaturage baba barizigamiye muri za Sacco.

Akaba yasabye ubuyobozi bwa Sacco Abahizi Dukire Mwendo, kutazarangwa n’iyo nyota yo kunyereza umutungo w’abaturage baba babagiriye icyizere.

Gusa nubwo iyi Sacco ivuye mu nyubako y’umurenge, ikaba igiye gukorera mu nyubako yayo, ngo iracyafite ibibazo by’umuriro n’amazi, kuko kugeza ubu umurenge wa Mwendo uri mu mirenge y’akarere ka Ruhango itaragerwamo amashanyarazi; nk’uko bitangazwa na Maurice Udahemuka umuyobozi w’iyi Sacco.

Twagirimana Epimaque ushinzwe imari n’iterambere mu karere ka Ruhango, yijeje abanyamuryango b’iyi sacco ko umuriro uzabagiraho mu gihe gito, kuko biri mu mihigo y’umwaka 2012-2013.