Nubwo ubwizigame buzamuka buracyari ikibazo kuri benshi

Nubwo ubwizigame buzamuka buracyari ikibazo kuri benshi

Muri rusange ubwitabire bwo kuzigama no kuguza mu mabanki n’ibigo biciriritse mu Rwanda buragenda buzamuka nkuko bivugwa n’ishyirahamwe ry’ibigo by’imari iciriritse ariko bamwe mu baturage bemeza ko bikiri ikibazo gikomeye.

Ibigo by’imari iciriritse mu Rwanda nka microfinance na za sacco biragenda bizamuka dore ko ubu habarizwa bene ibi bigo birenga 480.

Rwema peter umuyobozi ushinzwe ubushakashatsi n’iterarambere ry’ibigo by’imari iciriritse, mu ishyirahamwe ry’ibigo by’imari iciriritse mu Rwanda avuga ko ngo ubwizigame buzamuka ndetse n’ umubare w’abanyamuryango urazamuka. Kugeza ubu ngo abanyamuryango mubigo by’imari iciriritse mu Rwanda bari kurenga miliyoni imwe n’igice, iyi akaba ari intambwe ngo ikomeye cyane kuko  bigaragara ko abanyarwanda bari kuzamuka mu bukungu. Nyamara ariko ku rundi ruhande hari bamwe mu baturage bavugako bakigorwa no kwizigama.

Nyirakariza Rosine w’imyaka 28, ni umudamu utunze abana batatu, akaba nta mugabo agira.

Mu buzima bwe, ahingira umucumbikiye mu nzu abamo imibyizi ibiri mu cyumweru, ubundi akabeshwaho n’ubucuruzi bw’inkwi bumuha amafaranga 1500 ku cyumweru nkuko abyemeza.

Nyirakariza avuga ko muri rusange mu cyaro hari ubukene ku buryo kuzigama byagorana.

Ati: “mu cyaro haboneka amafaranga makeya ubasha gukoresha ukaba utabona ayo ujya kwizigama, baguhaye icyatanu ugahaha wazigama ayahe ko ahita ashira? Kuzigama si ibyatwese”.

Nyirakariza wemera ko gucunga neza amafaranga, bisaba kuba ufite mu mutwe habara neza, yemera ko abonye amafaranga ibihumbi 50 by’amanyarwanda  yatunga urugo ndetse akanazigama.

“ibihumbi 50 jye mbibonye nabicuruza kandi nkanazigama, nafata ibase nkajya mu isoko nk’abandi nkarangura ngacuruza nkunguka”.

Icyakora Rwema Peter umuyobozi ushinzwe ubushakashatsi n’iterarambere ry’ibigo by’imari iciriritse, mu ishyirahamwe ry’ibigo by’imari iciriritse avuga ko kwizigama bidasaba amikoro asaguka, ahubwo ko bisaba kwigomwa ndetse no kugira intego.

Ati:”kuri ayo Magana atandatu ahingira aramutse akuyeho ijana rimwe ku munsi mu kwezi aba afite ibihumbi bitatu, mu mwaka aba ari amafaranga menshi”.

Akomeza avuga ko abantu bose bakwiye kujya bafata icyemezo cyo kwizigama no kuri duke bafite kandi bikaba umuco. Ati: “kwizigama si uko uba ufite ibyasagutse ahubwo ni uko uba wigomwe ikintu runaka ariko ufite n’intego y’icyo ushaka kugeraho. Ni igiceri kirazigamwa”

Muri iki gihe leta y’u Rwanda irashishikariza abaturage kugana ibigo byo kuzigama no kuguriza mu rwego rwo gucika ku muco wo kubika amafaranga mu ngo nk’uko byahoze hambere.

Gusa bigaragara ko inzira igisa n’aho ari ndende mu gihe bamwe mu baturage bagaragagaza inyota y’ifaranga nk’imwe mu mbogamizi zibabuza kuzigama.

Share Button
Leave A Comment